أنا شخص بغيت نتعلم اللغة الإنجليزية أو أي لغة عموما ولكن كتواجهني حاجة معرقلاني ومعرقلة التعلم ديالي ولي هو الحشمة بمعنى انني كنحشم نهضر قدام الناس.
إلى كنتي واحد من هاد الناس بغيت نبشرك أن هادي حاجة عادية بزاف كتواجه أي واحد يالله ناوي اتعلم والتعليم ماشي فقط غير في اللغات وإنما في جميع أمور الحياة وبما أن صفحتنا خاصة بتعلم اللغات وبالأخص اللغة الإنجليزية فبغيت نقولك أن تعلم لغة جديدة تقدر تبان لك واحد الحاجة لصعيبة بزاف وشي مرات شي حاجة لكتخلع وبالأخص إلى كنتي من الناس لكيحشمو ( الحشمة شي حاجة لي زوينة ولكن نفرق بينها او بين الثقة فالنفس ).
ملي كنهدرو على اللغة كنتكلمو على شي حاجة لهي تفاعلية بمعنى خصني نهضر قدام شي واحد لخص إجوبني او أنا خاص نسمعوا انجوبو اهادي الصراحة واحد المرحلة صعيبة بزاف كيف ما قلنا لا كنتي شخص كحشم أو شخص إنطوائي.
درت هاد المقدمة الطويلة غير بش نقلك أنك مشي غير نتا بوحدك لكتحس بهاد الإحساس وإنما بزاف ديال الناس لعندهم نفس احساسك وكيحاولو نهار على نهار اواجهوه فهاد المنشور غادي نعطيك بعض النصائح وغادي نعطيك شي حاجات لربما نت كتحس بهم ملي كتبغي تكلم.
1- أول حاجة : كنصحك تبدا بوحدك لأنها غتكوون صفر توتر صفر ضغط وصفر نظرات ديل الناس. يمكن لك طبق هاد القضية بزاف ديل الطرق بحال تسمع الفيديوهات أتعود من وراهم، تستخدم تطبيقات كيعطيوك إمكانية تسجيل صوتك، تقرا كتوبا سوى ديال الصغار ولكبار، تسمع بودكاستس لا بغيتو ندير فيديو على أحسن التطبيقات خلوها لي فتعليق.
2- يمكن لك دخل في دورات إلكترونية بمعنى تشوف اساتدة كقريو أنلاين دخول معاهم، يمكن لك تختار دروس فردية أو جماعية أودرس مع مجموعة صغيرة، إلى كنتي سيدة مبغيتش دخلي مع الرجال تختاري مجموعات فيها غير النساء كذلك ومثال بالنسبة للرجال.
3- حاول أنك دخول في المجموعات الخاصة بتعلم اللغات وحاول أنك دردش معاهم، إلى كان شي سؤال جاوب عليه بحال هاكا غادي تبدا تكتاسب ثقتك في راسك.
4- الممارسة ثم الممارسة هي لغادي تعلمك، أخر حل نقدر نقدمو لك هو تشوف شي واحد من العائلة أو الأصدقاء لي المستوى ديالهم في اللغة الإنجليزية بحالك أو حسن منك باش تقدر تزعمو بعضكم وكنفضل أنه هاد الشخص مايكونش من فصيلة القلم الأحمر أو ستيلو حمر فينما تكلم أيبدا اصحح لك بنية أنه يبان قدامك أو حسن منك أما لا كان القصد ديالو اعلمك وطورك فعادي.
الكتابة مستحيل توصل الفكرة ولكن حاولت أنا فهاد الجزء نحطك فالصورة ولا وصلتي حتى لهنا بغتيك تجاوبني على هاد الوضعية وتخيلها معايا.
" واحد النهار، كنتي غادي فالمدينة وسط الناس أو الطريق عامرة قدر الله طحتي شي طيحة صعيبة كلش الناس ضارو عندك وبداو كيشوفو فيك اش غايكون احساسك؟ إلى كنتي نوع حشومي، وجهك أيولي حمر، دقات قلبك أتزاد، ريقك أينشف مغتقدرش تهز عينيك فالناس، ولكن وش غاد تبقى هاكاك ميمكنش غاد تنوض او غتزيد. دارت الإيام وقع لك نفس البلان طحتي تاني واش غادي تحس نفس الإحساس ديل المرة اللولا، أكيد لا والمرة الثالثة طحتي تاني كون على يقين غادي تنوض فالبلاصة"
هادشي كامل لقلت لك دابا دير عليه إسقاط في اللغة الإنجليزية او بغتيك تشرح لي في تعليق اش بغيت نقصد بخصوص اللغة الإنجليزية. إلى لقيت الناس فهموا قصدي داكشي لبغيت موصلتش الفكرة نتلاقاو فجزء ثاني.
كتابة : حمزة القصراوي
صفحة : تعلم لونكلي بالدارجة - English Bdarija